Новости

Лезгинские поэты о Сулеймане Стальском

Арифдардикай лезги шаирри

Сулейман

Гьижрандин лепейри гъайи мержан хьиз,
Уьмуьрдин кьерел вун текдиз амукьнай.
А йикъар ахпа, ви руьгьдин иман хьиз,
Кьисметдин шегьрейра къум хьизацукьнай.
Диде, буба авайтIани,
Етим хьайиди,
ЧIехи рикIин иеси тир
Касди хвейиди.
Ахъа хьанач ахпани ви
Яшайишдин цуьк.
Акъваз хьана адан рангар,
Гьа сифте хьиз гуьг.
Абур тир ви аял вахтар, Сулейман.
Фикирдизни текъвер тахтар,
Сулейман.

Чир хьанай вун, ирид йисаз атайла,
ГьикI ятIани къуншидаллай бубадиз.
“Тахай” кIвализ гужуналди хкайла,
Элкъвенай вун кьил авачир къубадиз.
Буба кьена, къалин хизан
Хиве гьатайди.
Аялзамаз менгенагрин
КIеве гьатайди.
Ийир-тийир квадарнач на,
Жагъурна жигъир,
Ачухардай зегьметдалди
Яшайиш, факъир.
Абур тир ви жегьил вахтар,
Сулейман,
Цуькведаллай гьеле бахтар,
Сулейман.

Халкь паталди цIийи девир алукьна,
Къенепатан дуьнья хьана экуь ви.
Илгьамдални къизилдин ранг ацукьна,
Ватан патал гьерекатна рикIи ви.
Москвада, гьевеслу яз,
Хушдиз рахайди,
Мидаимлу хьайи тIварцIиз
“Гомер” атайди.
Ви гьунарди лепе гана,
Дуьньядилай — цIар.
Гьейранна ви алакьунри
Чил, гьуьлер, вацIар.
Абур тир ви дигмиш вахтар,
Сулейман,
Гвай чпив ваз талукь тахтар,
Сулейман.

Къе ви тIварцIел дамахзава Куьреди,
Ви айгьамрин, гьахълувилин падхвейи.
Гьевеслу я Къуба, Ахцегь эбеди,
Келимайра яшайишдин дад хвейи.
Халкьдин юкьва уьмуьр фена,
Халкьчи хьайиди,
Гьахъсузвилел тур илигай
Авчи хьайиди,
Вуна гайи насигьатар
Яракьрай я чи
Гьар са касдин — кьуьзуьданни,
Чил кьурдан кIвачи.
Ибур я ви къенин вахтар, Сулейман,
ПIинид багъда тутур чафтар,
Сулейман.

                               Абдул Ашурагъаев


Район сагърай!

Югъ-къандавай вилик физвай,
ЦIийи багълар битмишзавай,
“Алсу”, “Мевер” дадмишзавай
Сулейманан район сагърай!

Шегьре рекьер, кьакьан кIвалер,
Залра ргаз бул мел-мехъер,
Тух жеч вилер, гьакьван иер,
Сулейманан район сагърай!

Арха, далу-дагълар галай,
Арагъ, Чирагъ вацIар авай,
Гуьрчег таза тамар авай
Сулейманан район сагърай!

Шембид булах, Латар-пIирер,
Кпул ятар, Гьажид вирер,
Герек дарман-дава авай
Сулейманан район сагърай!

Алкьвадар Гьасан-Эфенди,
Вич дуьньядиз машгьур хьайи,
Эминни Сулейман гайи
Сулейманан район сагърай!..

                                            Рамазан Дадашев

"Лезги газет" №23 от 6 июня 2019 г.

Количество показов: 445
13.06.2019